نەخۆشی کڕۆن

نەخۆشی کرۆن نەخۆشییەکی درێژخایەنە کە تێیدا هەندێک لە بەشەکانی کۆئەندامی هەرس تووشی هەوکردن دەبن. نەخۆشی کرۆن جۆرێکە لە جۆرەکانی نەخۆشیی هەوکردنی ڕیخۆڵە.

نیشانەکانی نەخۆشی کرۆن

نەخۆشی کرۆن دەکرێت تووشی کەسانی هەموو تەمەنێک ببێت. بەزۆری نیشانەکان لە تەمەنی منداڵی یان سەرەتای تەمەنی گەورەیی دەست پێدەکات.

نیشانە سەرەکییەکانی بریتین لە:

سکچوون

ئازار و گرژبوونی گەدە

بوونی خوێن لەناو پیساییدا

ماندوێتی (شەکەتبوون)

کێش دابەزین

دەکرێت نیشانەکان بەردەوام هەبن یاخود چەند هەفتە جارێک یان چەند مانگ جارێک بەدەرکەون. کاتێک نیشانەکان دەگەڕێنەوە پێی دەوترێت سەرهەڵدانەوە (فلێرئەپ).

کەی سەردانی پزیشک بکەین؟

سەردانی پزیشک بکە، تۆ یان منداڵەکەت:

ئەگەر لەناو پیساییەکەتدا خوێنت بینی 

ئەگەر زیاد لە ٧ رۆژ سکچوونت بەردەوام بوو

ئەگەر زوو زوو تووشی ئازاری گەدە یان گرژبوونی گەدە بوویتەوە 

ئەگەر بەبێ هۆکار کێشت دابەزی، یان منداڵەکەت بەو خێراییە گەشەی نەگرد کە چاوەڕێی دەکەیت

پزیشکەکەت هەوڵدەدات بزانێت هۆکاری سەرهەڵدانی نیشانەکانت چییە و لەوانەیە بتنێرێت بۆ پشکنین تا دڵنیا بێتەوە لەوەی کە ئایا نەخۆشی کرۆنت هەیە یان نا.

چارەسەری نەخۆشی کرۆن

نەخۆشی کرۆن بەتەواوی بنەبڕ ناکرێت، بەڵام لە ڕێی هەندێک چارەسەرەوە دەتوانیت نیشانەکان کەم کبکەیتەوە یاخود کۆنترۆڵییان بکەیت.

چارەسەرە سەرەکییەکان بریتین لە:

ئەو دەرمانانەی دەبنە هۆی کەمبوونەوەی هەوکردن لە کۆئەندامی هەرسدا – بەزۆری حەبی ستیرۆید

ئەو دەرمانانەی رێگری لە سەرهەڵدانەوەی هەوکردنی ریخۆڵە دەکەن – یان حەب یان دەرزی

نەشتەرگەری بۆ لابردنی بەشێکی بچووک لە کۆئەندامی هەرس – هەندێک جار ئەم جۆرە لە چارەسەر ڕەنگە بژاردەیەکی باشتر بێت لە دەرمان.

ژیانکردن لەگەڵ نەخۆشی کرۆن

ژیانکردن لەگەڵ نەخۆشی کرۆن لە هەندێک کاتدا دەکرێت قورس بێت. سەرهەڵدانەوەی پێشبینی نەکراو و پشکنینی بەردەوام لە نەخۆشخانە یاخود نۆرینگە رەنگە ببێتە هۆی تێکچوونی خوێندن و کار و ژیانی کۆمەڵایەتیت.

بەڵام ئەگەر نیشانەکان بە باشی کۆنتڕۆڵ بکرێن، دەتوانیت ژیانێکی ئاسایی لەگەڵ ئەو حاڵەتەدا بژیت.

هۆکارەکانی تووشبوون بە نەخۆشی کرۆن 

هۆکاری نەخۆشی کرۆن هێشتا نەزانراوە. 

وابۆی دەچن کە چەند شتێک بۆیان هەیە ڕۆڵیان هەبێت، لەوانە:

جینەکانت – ئەگەری زیاترە کە تووشی ئەم حاڵەتە ببیت ئەگەر ئەندامێکی نزیک لە خێزانەکەت تووشی بووبێت

کێشەیەک لە سیستەمی بەرگریتدا هەبێت کە دەبێتە هۆی هێرشکردنە سەر کۆئەندامی هەرس

جگەرەکێشان

نەخۆشی پێشووی گەدە

هاوسەنگییەکی نائاسایی بەکتریاکانی ڕیخۆڵە

هیچ بەڵگەیەک نییە کە ئاماژە بەوە بکات کە سیستەمێکی خۆراکی تایبەت ببێتە هۆی نەخۆشی کرۆن

You cannot copy content of this page